Dunyo boʻylab musiqa borasida tajriba almashish, yangi asarlar yaratish va musiqa sohasida hamkorlik qilish maqsadida tashkil etilgan OneBeat dasturi dunyoning turli mamlakatlaridan navbatdagi tajriba almashinuv dasturi uchun arizalar qabul qilmoqda. Ushbu dastur maqsadi – dunyo musiqachilari orasidagi hamkorlikni mustahkamlash va original asarlar yaratish.
Hozirda 2025-yilning bahorgi mavsumiga arizalar qabul qilinmoqda.
Joriy qabulda 50 ga yaqin davlatdan jami 25 nafar atrofida nomzod qabul qilinishi rejalashtirilgan. Dastur odatda bir oy davom etadi. Bunda ishtirokchilar AQSHda 2-3 haftalik rezidensiya dasturida ijod qiladi, shuningdek, 10-14 kunlik musiqa turini uyushtiradi.
Mazkur dastur AQSH davlat departamentining Taʼlim va madaniy masalalar byurosi tashabbusi hisoblanadi va AQSH hukumati tomonidan moliyalshtiriladi.
Grant kimlar uchun?
Havaskor va professional musiqachilar uchun
Batafsil ma'lumot uchun link
Grantning manfaatli jihatlari:
Dasturga qabul qilingan quyidagi moddiy imtyozlarga ega boʻladi:
- Dasturga qatnashish bilan bogʻliq barcha xarajatlar, jumladan, AQSHga borish va qaytish, turar joy xarajatlari qoplanadi.
- Ishtirokchilarga kunlik stipendiya va 600$ miqdorida gonorar ham beriladi.
Talablar:
Nomzod quyidagi talablarga mos boʻlishi kerak:
- Nomzodlar 2025-yil aprel oyi holatiga koʻra, kamida 19 yosh; 2025-yil may oyi holatiga koʻra, koʻpi bilan 35 yosh boʻlishi lozim.
- Nomzod belgilangan davlatlardan birining fuqarosi boʻlishi kerak (bu davlatlar orasida Oʻzbekiston, Qirgʻiziston va Qozogʻiston ham bor).
- Qatnashmoqchi boʻlgan musiqachilardan biror oliy yoki oʻrta taʼlim muassasasida musiqa boʻyicha oʻqiganlik talab etilmaydi. Taʼlim darajasidan qatʼi nazar, barcha musiqachilar ariza berishi mumkin.
- Musiqaning istalgan sohasida faoliyat yurituvchi (ijod qiluvchi) musiqachilar ariza berishi mumkin.
- Nomzod ingliz tilini oz boʻlsa-da, muloqot qila oladigan darajada bilishi kerak.
- Barcha ishtirokchilar elektron pochtadan faol foydalanishi va onlayn mashgʻulotlarda qatnashish uchun internetga ulanish imkoniga ega boʻlishi kerak. Ishtirokchilarning barchasi noutbuk yoki kamerasi boʻlgan boshqa qurilmaga hamda dasturda qatnashishi uchun aloqasi ishonchli (uzilib qolmaydigan) interetga ega boʻlishi kerak
Nomzodlar quyidagi mezonlarga asosan saralab olinadi:
- Musiqadagi mahorati.
- Boshqalar (boshqa madaniyat va millatlar) bilan hamkorlikda ishlash olish qobiliyati.
- Ijtimoiy faolligi.
- Raqamli savodxonlik (elektron va raqamli vositalarda ishlay olishi).
Talablar bilan batafsil shu yerda tanishing.
Dasturga qabul jarayoni:
Arizalar 2024-yil 6-sentabrgacha qabul qilinadi. Biroq nomzodlarga ariza topshirishni eng oxirgi kunga taqamaslik tavsiya qilinadi.
Arizalar onlayn tarzda BU YERDA qabul qilinadi. Onlayn arizani toʻldirish uchun dastlab tizimda roʻyxatdan oʻtib (register), akkaunt ochish kerak. Shundan soʻng arizada soʻralgan maʼlumotlar kiritib, kerakli hujjat va fayllar yukalanadi.
MUHIM: Ariza topshirishga kirishishdan oldin dastur haqidagi rasmiy eʼlon va koʻp beriladigan savollarga javoblarni batafsil oʻqib chiqing.
Savollar yuzasidan apply@1beat.org elektron manziliga murojaat qilishingiz mumkin.
