Oliy va oʻrta maxsus taʼlim vazirligi super-kontraktlar haqida qoʻshimcha rasmiy maʼlumotlarni maʼlum qildi:
Oʻqishdan yiqilib, kontraktning kirish chizigʻiga 4 balldan ortiq yetmagan hamda 56,7 dan koʻp ball toʻplagan abituriyentlar uchun super-kontraktning minimal miqdorlari tasdiqlandi. Kirish chizigʻiga 4 ballgacha yetmaganlar super-kontraktni quyidagi miqdorda toʻlashadi:
- 1 ballgacha yetmagan abituriyentlar uchun – 1,5 barobar;
- 1.1 balldan 2 ballgacha yetmaganlar uchun – 2,0 barobar;
- 2.1 balldan 3 ballgacha yetmaganlar uchun – 2,5 barobar;
- 3.1 balldan 4 ballgacha yetmaganlar uchun – 3,0 barobar.
Shuningdek, toʻplagan bali kirish chizigʻiga 4 balldan ortiq yetmagan, lekin 56,7 dan koʻp ball toʻplagan abituriyentlar uchun super-kontrakt miqdorlari tasdiqlandi. Miqdorlar oʻtgan yilgidan deyarli oʻzgarmagan. Miqdorlar bilan SHU YERDAGI PDF faylni yuklab olib batafsil tanishishingiz mumkin.Eng qimmat miqdor yurisprudensiya yoʻnalishida — 25 barobar, yaʼni 229 mln 184 ming soʻm.
Keyingi oʻrinda tibbiyot yoʻnalishiniki — 20 barobar, yaʼni 170 mln 649 ming soʻm.
Qolgan yoʻnalishlar 10 va 15 barobar miqdorda belgilangan.
ESLATMA: ushbu narxlar minimal miqdor hisoblanadi. Joriy yildan boshlab OTMlar super-kontrakt narxini oʻzi mustaqil belgilaydi, faqat asosiy sharti minimal miqdordan kam boʻlmasligi kerak. Yaʼni yurisprudensiyada super-kontrakt 229 mln soʻmdan kam boʻlishi mumkin emas, lekin talabga qarab bundan qimmat boʻlishi mumkin. Super-kontrakt narxining aniq qancha boʻlishini OTMdan borib bilishingiz mumkin.
2-ESLATMA: 56,7 balldan kam toʻplaganlar super-kontraktning kamida 2 barobarini toʻlashadi. Masalan, yurisprudensiya kamida 50 barobar, tibbiyot kamida 40 barobar va h.k.
Joriy yilda abituriyentlar uchun super-kontrakt toʻlashda quyidagi yengilliklar beriladi:
- super-kontraktni birinchi, ikkinchi va uchinchi yoʻnalishda ham oʻqish mumkin;
- super-kontrakt miqdorlari stipendiyasiz bazaviy toʻlov-kontrakt miqdorlariga nisbatan hisoblanadi (yaʼni narxlar arzonlashadi);
- toʻlovchilarning oʻz hohishiga koʻra stipendiyali toʻlovlar, yaʼni, tabaqalashtirilgan toʻlov-kontrakt summasiga (bir oʻquv yili uchun 4,8 mln soʻm) qoʻshimcha toʻlash mumkin. Yaʼni agar istasa 4,8 mln soʻm qoʻshib toʻlasa, talaba har oy stipendiya olishi ham mumkin boʻladi;
- super-kontraktni yil davomida ikkiga boʻlib yoki hattoki oylarga boʻlib toʻlash imkoniyati ham beriladi;
- bunda super-kontrakt miqdorini oylarga boʻlib toʻlanganda ham, oʻquv yilining birinchi yarmi uchun kamida 50 foizi joriy yilning 1-noyabridan hamda ikkinchi yarmi uchun 2020-yilning 1-martidan kechiktirmay toʻlanishi lozim;
- yuqoridagi qoidalar kirish chizigʻiga 4 ballgacha yetmagan abituriyentlar uchun ham amal qiladi;
- ikkinchi va uchinchi yoʻnalish uchun ham super-kontraktga ruxsat berildi. Yaʼni oʻqishga kirish uchun yetarli ball toʻplay olmagan abituriyentlar roʻyxatdan oʻtish mobaynida tanlagan ikkinchi yoki uchinchi bakalavriat taʼlim yoʻnalishi boʻyicha tabaqalashtirilgan toʻlov-kontrakt asosida oʻqishga ruxsat berildi.
