Gollandiyada joylashgan Maastricht universiteti magistratura bosqichida oʻqishni xohlovchilar uchun UM Holland-High Potential Scholarship grant dasturini taklif etadi. Grantlar shu universitetda o’qitiladigan belgilangan magistratura kurslariga qabul qilingan, Yevropa Ittifoqi va Yevropa Iqtisodiy Hududidan tashqaridagi davlatlar fuqarolari uchun moʻljallangan.
2024-yil kuzda boshlanadigan oʻqish uchun jami 24 ta grant ajratiladi.
Maʼlumot uchun: Maastricht universiteti dunyoning eng nufuzli universitetlaridan biridir. Jumladan, 2023-yil sentabr oyi holatiga koʻra, bu universitet dunyodagi eng kuchli oliygohlar roʻyxatida 256-oʻrinni egallab turibdi (QS reytinggi boʻyicha).
Grant kimlar uchun?
Magistratura kursida o’qishni xohlovchilar uchun
Batafsil ma'lumot uchun link
Grantning manfaatli jihatlari:
Grantni qoʻlga kiritgan talabalar quyidagi iqtisodiy imtiyozlar bilan taʼminlanadi:
- 1 yillik magistratura dasturlarida 13 oy uchun 12 350 yevro yoki 2 yillik magistratura dasturlarida 25 oy uchun 23 750 yevro stipendiya.
- Salomatlik va javobgarlik sug’urtasi (700 yevro qiymatiga ega);
- O’qish to’lovi toʻliq qoplanadi (tanlangan magistrlik kursiga qarab, oʻqish toʻlovi uchun 13 800 yevro, 16 000 yevro yoki 16 800 yevroga teng).
- Vizaga ariza topshrish xarajati uchun 192 yevro mablagʻ ajratiladi.
- Zarur hollarda oʻqishdan oldingiz tayyorlov kurslari xarajatlari qoplanadi.
Eslatma: Yuqoridagi summalar miqdorida biroz oʻzgarish boʻlishi mumkin.
Talablar:
Nomzodga qoʻyilgan talablar quyidagilardan iborat:
- Nomzod quyidagi davlatlardan birining fuqarosi boʻlmasligi kerak: Shveytsariya, Surinam, Yevropa Ittifoqi va Yevropa iqtisodiy hududidagi joylashgan davlatlar. Shuningdek, Gollandiyaga kirish vizasi va yashash ruxsatini olish talablariga javob berishi kerak.
- Yervopa Ittifoqi yoki Yevropa iqtisodiy hududida joylashgan davlatlardan birida ikki fuqarolikka ega boʻlmaslik kerak.
- Maastricht universitetidagi grant uchun belgilangan magistrlik kurslaridan biriga uzluksiz taʼlim (full-time) shaklida oʻqish uchun ariza topshirish kerak.
- Nomzod oʻzi ariza topshirgan magistrlik kursining qabul talablariga, jumladan, ingliz tilini bilish darajasi talabiga javob berishi kerak.
- Gollandiyada oliy taʼlim darajasini beruvchi kurslarda oʻqimagan boʻlishi kerak. Almashinuv dasturlarida oʻqiganlar ariza topshira oladi.
- 2024-yil 1-sentabr holatiga koʻra, 35 yoshdan katta boʻlmaslik kerak.
- Nomzod Maastricht universitetidan oldingi oʻqish joyida aʼlo baholarga oʻqigan boʻlishi, buni topshiradigan baholari (diplom ilovasi) yoki akademik mahorati (academic excellence) haqidagi tasdiqlangan xat orqali isbotlashi kerak. Agar bir nechta nomzod grant uchun saralashda bir xil natijaga ega boʻlib qolsa, oʻqish joyida eng yuqori akademik natijaga ega 5% talabalar safiga kiruvchi nomzodga ustunlik beriladi.
Dasturga qabul jarayoni:
Grantga arizalar 2023-yil oktabr oyidan boshlanadi va 2024-yil 1-fevralgacha davom etadi.
Grant uchun ariza topshirish jarayoni quyidagi tartibda amalga oshiriladi.
1-qadam. Maastricht universitetidagi tegishli magistrlik dasturlaridan biriga roʻyxatdan oʻting. Magistrlik dasturiga qanday roʻyxatdan oʻtish haqida batafsil maʼlumotni dastur veb-sahifasidan olishingiz mumkin. Studielink orqali magistrlik dasturiga ariza topshirganingizda sizga talaba ID raqami beriladi. Bu raqam grantning ariza shaklini (2-qadamga qarang) toʻldirish va topshirish uchun kerak boʻladi.
1-qadamga oid qaydalr:
- Faqat ushbu roʻyxatdagi magistrlik kurslariga topshirganlar UM Holland-High Potential Scholarship granti uchun ariza topshira oladi.
- Magistrlik kursi va grantga bir vaqtning oʻzida ariza topshirishingiz mumkin. Lekin grantni qoʻlga kiritish uchun magistrlik kursiga shartli yoki shartsiz qabul qilinishingiz kerak.
- Agar magistrlik kursiga topshirilgan arizani koʻrib chiqish uchun qandaydir toʻlov mavjud boʻlsa, bu toʻlovni 2024-yil 1-fevralgacha toʻlashingiz talab etilishi mumkin. Grant ushbu toʻlovni qoplab bermaydi. Toʻlov bor yoki yoʻqligini kerakli magistrlik kursi sahifasiga kirib, “Admission Requirements” boʻlimidan koʻrib olishingiz mumkin.
2-qadam. Grant uchun ariza shakli toʻldiriladi. Har bir fakultetga alohida ariza shakli toʻldiriladi. Grant uchun kerakli hujjatlar roʻyxatini BU YERDAN topasiz.
Ariza shakli toʻldirilib, quyidagi hujjatlar .doc, .docx yoki PDF formatda yuklanadi hamda ariza topshiriladi (Submit):
- CV. CV hozirga qadar faoliyatingizni qamrab olgan, unda tegishli taʼim va ish/amaliyot tajribangiz koʻrsatilgan boʻlishi hamda 2 betdan oshib ketmasligi kerak.
- Motivatsiya xati. Motivatsiya xati 1 betdan oshmasligi (A4 formatida hisoblanadi), unda UM Holland-High Potential Scholarship granti nimaga siz uchun muhimligi, nega sizga taqdim etilishi kerakligi, oʻqish davrida va oʻqishni tamomlagandan keyin sizning Maastricht universiteti elchisi sifatidagi sifatidagi rolingiz qandayligini ochib berishi kerak. Motivatsiya xatini tayyorlashda BU NAMUNADAN foydalanish kerak.
- Akademik maharatingizning isboti (Proof of academic excellence). Buni quydagi hujjatlarning birini topshrish orqali isbotlashingiz mumkin:
– Universitetda olgan baholaringiz (transcript), bunda butun oʻqish davri mobaynidagi baholaringiz oʻrtachasi yoki daraja reytinggi (masalan, first class honours) aniq koʻrsatilgan boʻlishi kerak.
– Kafedra mudiri (Head of Department) yoki oʻquv ishlari boʻyicha masʼul mansabdor xodim (Registrar) tomonidan berilgan imzolangan xat Bunda sizning oʻqigan kursingizdagi eng yaxshi 20 talabadan biri ekaningiz tasdiqlangan boʻlishi va xatni bergan masʼulning kontakt maʼlumotlari koʻrsatilgan boʻlishi kerak. - Moliyaviy ehtiyoj haqida shaxsiy bayon. Siz uchun bu grant qanday manfaat keltirishini hamda oʻzingizning shaxsiy sharoitlaringizni (masalan, moliyaviy qiyinchilik, farzandga gʻamxoʻrlik qiluvchi yagona ota yoki ona ekanligingiz, xastalik, nogironlik, qochqinlik statusi va h.k.) tasvirlab berasiz.
- Tavsiya beruvchining kontakt maʼlumotlari. Tavsiya beruvchining haqiqiyligi u bilan bogʻlanish orqali tekshiriladi. Shu sababli tavsiya beruvchini tanlashda quyidagi talablar bajarilishi va maʼlumotlar/materiallarning topshirilishini taʼminlang:
– Arizachiga aloqasi: tavsiya beruvchining sizga aloqasini koʻrsating, u sizning professer oʻqituvchingiz yoki illmiy rahbaringiz yoki ish beruvchingizmi? Oila aʼzolar tavsiya bera olmaydi.
– Tavsiya beruvchining ish tlefon raqami: telefon raqamida qoʻngʻiroq qilish uchun mamlakat kodini ham yozishni unutmang.
– Tavsiya beruvchining ish yoki universitet elektron pochta manzili. Tavsiya beruvchining faqat shaxsiy elektron pochta manzili oʻz ichiga olgan tavsiyanomalar rad etiladi.
– Tavsiya beruvchi taqdim etgan tavsiyanoma xati. Tavsiyanoma 2022-yil fevral oyidan keyin berilgan boʻlishi lozim.
Tavsiyanoma boʻyicha qoʻllanmani BU YERDAN topasiz.
Grant arizasini faqat bir marta topshirish mumkin, shu sababli barcha hujjatlar va tavsiya beruvchining maʼlumotlari joriy sanagacha yangilangan ekaniga ishonch hosil qiling. Hujjatlar ingliz tilida topshirilishi lozim.
Natijalar 2024-yil aprel oyida eʼlon qilinadi.
MUHIM: Ariza topshirishga kirishishdan oldin grant haqidagi rasmiy eʼlonni batafsil oʻqib chiqing.
Murojaatlar uchun: hhp.scholarship@maastrichtuniversity.nl
